schulagschdanzln
w.v.wizlsperger
foalesung:
a gschdanzl faungd au
und head wida auf
und waun am end dleid ned lochn
daun legts no ans drauf
nau daun legn ma no ans drauf
und a des head daun wida auf
und wauns am schlus wieda nua fadrus gibt
kauns a sei das aun uns liegt
owa wauns daun wida ned lochn
daun ziagn ma di krochn
und wea daun ned apladiat
wiad auf da schdö füsiliat
und is hi daun des bublikum
bring ma uns söwa um
leida waa daun s konzeat foabei
des is di gfoa dabei
a gschdanzl wos kan witz hod
des nennd ma gedicht
owa waun a gschandzl a gedicht is
entbehrts auch an witz nicht
jo an reim und an ritmus
muas a echts gschdanzl hobm
waun sa si fost goa ned reima tuat und a
kan ritmus ned hod daun is´ gauns sicha
a föschung
fia zeun hod a gschdanzl
gaunz schdreng noch da reih
owa des hod nua drei
«
gestan & heint:
jo und gestan und heit
hod di sun so schee gscheint
hod no nia so schee gscheint
ois wia gestan und heint
jo und heinte und gestan
hods grocht wia im westan
s hod no nia grocht wia im westan
aussa heinte und gestan
und mugn fua an munat
do hods fiachtalich dunat
s hod scho efta so dunat
ois wia muagn fua an munat
«
reimsparend:
jo, da ane mocht metta
und da aundre brobleme
und da dritte mocht goa niggs
owa oin geeds sea guat
und da viate mocht bresln
und da fünfte an mist
nua da sechste mochts bessa
und ea haut si in d gluat
«
köapa & geisd:
wauns da guad geed daun loss´ renna
geeds da schlecht daun dsaa au
waunsd is rena lossd wauns da schlecht geed
daun schdeesd boid amoi au
weu waunsd ka hian hosd nua eia
daun geesd sea leicht meia
nua mid eia und kan hian
jo do kaunsd nua falian
und des hian drukkt mi im schedl
und da schedl drukkt am hois
oinfois brennt im hois da schlund drin
ois aundre is gsund bliebm
nua da mogn is rewölisch
und di nian setzn aus
und beim pinkln brennts höllisch
i glaub i gee jezz daun zhaus
«
144a:
tatüü und tataa
die rettung ist nah
a waun d leich scho leichd dod is
foa ma driwa wauns rod is
is di leich scho leichd grün im gsicht
schoit ma ei s blaue licht
daun no is matinshoan
leitln des is a foan
«
liebe:
jo da brimbocha berti
dea schdeed sea auf die gerti
waun di gerti a am berti schdee dad
daun kunnts sei das do wos gee dad
sie singd wia a aumschl
sie is gscheid wia dseen robm
und sie wezzt gean i schnawal aun sein schbozz
so a masn muassd hobm
gaunz schdeif und sea föamlich
hauma gestan diniat
untam disch hod die gräfin
d schdeifn föamlich dawiagt
«
u baun:
noch siebmhiatn zum wiatn
do geesd gscheida zfuas
weu d u6 bei siebm wiatn
amoi zkuaz kuma muas
ob foaschein ob fiadl
es hod ois sein breis
foan tua i liawa schwoaz
owa saufn nua weis
«
brominenz:
sogt di ott zu da kraina
du da leina is meina
sogt die kraina zu da ottn
reib dan ei den falottn
weil mich füllt da kika aus
midsaumt sein möblhaus
mia teiln uns tisch und bett
und er kikt a sea nett
trifft da mulia den hiaschal
sogt gris dich gott biaschal
neilich hob ich dich in fernsehn gsehn
mit da mendt s woa sea scheen
sogt da hiaschal zum mulia
heasd fritz waun i schwul waa
daun brakkat i dan jezz gean eine
bis zum schdeissgebeine
trifft da hollenda den schenk
lond eam ei auf a glaans getrenk
da schenk schreit i wü an doppla
oda leich ma dei opa
a poa bia von da billa
wöt da schenk inhalian
in babia von sewilla
deaf a jezz inszenian
ruaft da mozart in bach au
sogt hauns huach ma zua
heast gees jo ned zu gaach au
sunst schbeast boid wieda zua
sogt zum mozart da bach drauf
heast wos scheat´n des mi
i bin von haus aus eha zaach drauf
und sowieso scho laung hi
«
frog mi ned:
mia is im lebm nie wos gschenkt wuan
und i hob ma niggs gnuma a
i bin ois niemand gebuan wuan
schdeabm wea i ois nummara
zwaradreissg dreiazwanzg
ce te be ocht ka zwa
a em es neinasechzg
sogt daun baba
«
tod:
hauts eam owe in d gruabm
den fasoffanen suam
sön drei bfora schrein bei mein begräbnis
des wiad mei scheenstes erlebnis
auf mein grobschdaa soins schreibm
ea woit nimma bleibm
kochn kenna hod a genial
nua sei kunst woa banal
ea woa bei gott a schenie
owa gmeakt hod mas nie
weu wos bei gott genial is
fia di leid schdinknoamal is
jo kunst kummt von
kunst ned schnölla singa
das ma do wos weidabringa dan
waun ma nua wos weidabringd
waumma schnölla singt
draa i mi haam
jo jezz hea i zum singa auf
sunst geed eichs gimpfte auf
waun si iwan und i si
gawat i ma des nie
«
wia ma sogt:
a schnuaboad a grochn
wia ma sogt: bolizei!
mea haumma braktisch ned brauchd
mea wiads a ned sei
drei säag und a bfora
wia ma sogt: eine leich!
jezz brauch ma braktisch niggs mea
owa des is uns neich
a bia zu an gulasch
is sogt ma: ein muss!
mea brauch ma braktisch a ned
und jezand is schluss
«
