ein schöner tag
w.v.wizlsperger | p.skrepek

ein schöner tag geht nun zu ende
i gschbias mia foin scho d augaln zua
die leeren flaschen sprechen bände
die gerda hod scho fü zfü und i a scho mea wia gnua

drei doppla rot und fost sechs lita weis
liegn no friedlich im kölla und singan gaunz leis:
es wird ein wein sein und ia weads nimma sein
a hoibs kilo söchschbegg hängt schdü in da schbeis
aun mia do hängt die gerda, gauns faread und kaasweis

gee gerda jezz waan ned red i sie liab au
du bist jo mei oide und i bin dei mau
wos wüsdn no mea vo dein augschittn lebm
no und ois wosd mea woitast kunntat i dia ned gebm
ois wos mea woitat kunnt ea ia ned gebm

«

i waas ned wosd wüsd, mia haums doch sea schee
des glo ned am gaung und im bod a bidee
a wohnung foi mewü an schbegg in da schbeis
gwaund und grawattn und schuach haufnweis

da wein liegt im kölla und gfreid si auf muagn
i lieg auf da kautsch, heasd weng wos mochst da suagn
du hosd dei hokkn, daung in heagod dafia
i hob sea fü dseid und die widme ich dia
ea hod sea fü zeit und die widmet ea ia

heast mausi wos reastn, i waas ned wosd hosd
a poa tog fuam easchtn hod hoid kaana a mos
waun d hockn ned rennt do kaun i a nix dafia
des is so fuam easchtn do sans ole schdia
des is hoid a draama, do kau ma niggs mochn
jezand schuasdans dahaam, weus ole so grochn
ole schuasdan dahaam weus fuam erschtn so grochn

«

hea auf jezz zum blazzn, des kaunst auf mein grob
und muagn geesd in d hokkn, weu sunst wia i grob
muagn wiad wieda audsaad, do gibds ka badon
muagn hasds fleissig sei weill sonst gibt es beton
muagn hasds lustig sei sunst gibds beton

owa kaum bin i fertig mid meina kadenz
gräud de gerda in ian schwü dsua kuchlgredenz
wos mochts? hoids a messa? und graglds mi oo?
owa wo owa wo owa wo hollaro

sie nimmd a seawietal und schneidsd si das s grocht
i hea bis zua kautsch hi wias proweweis locht
daun woscht sa si s gsichtal im neichn bidee
es ist was es ist und is lebm is schee
es ist was es ist und is lebm is schee

«

und daun daun tamün ma bladlwaach hinüba in unsa schlafgemach
daun legts eich blunznfett in eicha radiobett
und singts ois nochtgebett zu zweitt a duett

is lebm geed weida und mia wean ned gscheida
do sogn ma hoid leida nua die dseid bleibd ned schdee
mia wean ned jinga ma gschbiads zwischn d finga
s lebm muas weida gee, sauf mas uns schee
is lebm geed weida und bessa wiads nimma
s lebm muas weida gee, sauf mas uns schee

schuba duba ...

jo singa is lustig a wau ma s ned kau
i bin die gerda und du bisd mei mau
.... und i bin dei mau
«